【信公關不如信自己 我就係公關！】
做人唔可以無公關，公司亦都一樣。有好公關，可以塑造良好形象，同傳媒打好關係，遇上公關災難時見招拆招，甚至轉危為機。你見香港政府出咁多錢想請個好公關，就知道公關有幾重要喇！不過，又唔係每間公司都咁傳統嘅，就好似顛覆業界嘅Tesla創辦人Elon Musk，最近就大膽解散成個公關部門。傳媒想攞Tesla料？上佢Twitter自己睇喇！
「自己就係公關」另一個值得探討問題，就係Elon Musk會將自己同品牌捆綁。你見市場上好少公司會咁樣做，因為風險極之大，一旦自己形象受損或行差踏錯，就會連帶公司一齊攬炒，點解Elon Musk會咁做呢？我相信關佢個人魅力事，今年升幅驚人嘅Tesla股票，不斷突破歷史高位，有人講笑話買Tesla股票係一種信仰，與其話睇中Tesla公司前景，其實係睇中Elon Musk能力。依家佢喺Twitter求其講句說話，都足以影響公司股價升跌，威力大過公關講一百句。所以，唔係佢想將自己等同Tesla，而係外界標籤將佢等同Tesla。既然係咁，需要公關作用又真係大減嘅。
其他科技巨頭Amazon、Facebook、Google業務上晒軌道穩定發展，就算內部大執位都問題不大，相反Tesla仍然處於打仗階段，受到競爭者四面夾擊，公司可以行到幾遠、飛得幾高，主要係睇Elon Musk能耐，教主之位可謂不能撼動！所以將自己同品牌捆綁有利有弊，好似Elon Musk咁有魅力更易吸納到一班「信徙」，但係另一方面，Tesla投資者就要求神拜佛，祝Elon Musk一直身體健康事事順利喇！
Search